Posedimi i armëve të zjarrit është shndërruar në një dukuri negative, pasi që përpos që është e kundërligjshme, po cenohet edhe siguria e qytetarëve. Personat e armatosur shpesh herë ato i përdorin për të kërcënuar ata me të cilët kanë telashe, por ka raste që përpos që i frikësojnë, i shkrepin ato dhe gjithçka përfundon tragjikisht, raporton Gazeta Sinjali.
Një rast i tillë është zbuluar gjatë ditës së djeshme në fshatin Burojë të Skenderajt, ku një patrullë e Policisë ka ndalur për kontroll një veturë.
Sinjali mëson se gjatë kontrollimit, te shoferi i veturës është gjetur një armë zjarri me një karikator dhe fishekë dhe dy sprej, të cilat janë konfiskuar nga Policia.
Ndërkohë 30-vjeçari është prangosur dhe është shoqëruar në stacion policor për intervistim.
Me urdhër të prokurorit, ndaj tij është iniciuar rasti ‘Mbajtje në pronësi, kontroll ose posedim të paautorizuar të armës’.
Ndryshe, “Kushdo që mban në pronësi, kontrollon ose posedon armë në kundërshtim me ligjin e zbatueshëm lidhur me armë të tilla, dënohet me gjobë deri në shtatëmijë e pesëqind (7.500) Euro ose me burgim deri në pesë (5) vjet.“