Ka shumë vjet që kanalizimi në lagjen e Lushtakëve në Prekaz ka shpërthyer dhe ujërat e zeza kanë vërshuar nëpër ara të banorëve të kësaj lagjeje, por edhe pranë shtëpive e madje edhe në oborre. Një familje që është rrezikuar seriozisht, pasi që ujërat e zeza kalojnë fare pranë shtëpsë, po edhe nëpër oborr, është ajo e Fahredin Lushtakut. Nga era e rendë që kundërmon është vështirësuar edhe jeta e tyre në shtëpi. Përveç kësaj, as arat nëpër të cilat tani janë përmbytur nga ujërat e zeza nuk mund të punohen.
Vetë Fahredin Lushtaku, banor i kësaj lagjeje i ka deklaruar Gazetës Online Vision Mega se problemin me ujërat e zeza e ka paraqitur disa herë në Komunën e Skenderajt.
“Ka më shumë se një vit që bëj kërkesë në komunë, por askush nuk merret me problemin që kemi. Jemi lodhur tashmë, kanalizimi ka shpërthyer dhe ne vuajmë, nuk mund ta bëjmë as gjumin rehat, unë ta zëmë nuk mund as t’i hapë dritarët e shtëpisë sepse kundërmon erë e rendë. Madje as token nuk mund ta punoj e as livadhet nuk mund t’i shfrytëzoj. Kam shkuar edhe në kompaninë e Ujësjellësit, por atje më kanë thenë se Komuna është ajo që duhet me kërku nga kompania të dalë në vend dhe t’i evitojë defektet në rrjetin e kanalizimit”, thotë mes tjerash, Fahredin Lushtaku, një prej banorëve të lagjes “Lushtaku” në Prekaz.
Në anën tjetër, Gazeta Online Vision Mega është përpjekur të kontaktojë me zyrtarët e Drejtorisë për Shërbime Publike, por nuk ka arritur ta merr asnjë informacion lidhur me problemin që kanë qytetarët në lagjen Lushtaku, pasi që siç i ka deklaruar gazetës një prej zyrtarëve të kësaj drejtorie, ‘drejtori nuk ndodhet aty’.
