Tre nga fjalëkalimet më të zakonshme në të gjithë botën që prej nëntorit të vitit 2020 janë: 123456, 123456789 dhe image1.
Këto fjalëkalime mund t’i keni përdorur edhe ju ndonjëherë për të siguruar rrjetet sociale apo llogaritë bankare, megjithatë duhet ta dini se këto kode janë ndër më të lehtat dhe që shfaqin rrezik.
Me një fjalëkalim të tillë bizneset dhe individët janë të rrezikuar që të bien pre e hakerimit.
Për këtë arsye kompania Intel ka themeluar Ditën Botërore të Fjalëkalimit (World Password Day), 6 maj, dhe këtë ajo e ka bërë për të shtyrë njerëzit që të përdorin fjalëkalime sa më të forta dhe unike.
Shumë përdorues të teknologjisë humbën vitin e kaluar të dhëna personale dhe ranë në rrjetën e krimit kibernetik.
Topher Tebow, analist i Acronis Cyber Protection, tha:
“Shkeljet e të dhënave duket se janë bërë një dukuri e përditshme. Kjo do të thotë që të dhënat tona të ndjeshme, duke përfshirë kredencialet e llogarisë, kanë më shumë të ngjarë se kurrë të përfundojnë në duart e kriminelëve.”
Fakti është që askush nuk do të donte që t’i vidhej llogaria e tij sociale, bankare apo ajo e biznesit, prandaj kini parasysh që kyçi për këtë gjë është vënia e një kodi “të pathyeshëm”.