FFK lëshon reagim për 35 orë dore
Federata e Futbollit e Kosovës e ka lëshuar një reagim në lidhje me lajmin që qarkulloi sot se i ka blerë 35 orë dore në prag të zgjedhjeve për kryetar të FFK-së.
FFK thotë se nuk ka blere e as nuk ka zhdoganuar orë dore, edhe pse zyra për media e FFK-së paraprakisht kishte deklaruar për “Paparacin”: “FFK, në kuadër të veprimtarisë së vet, ndër të tjera blenë edhe gjëra të cilat i nevojitën FFK-së për nevojat e brendshme të saj, si dhe për shkëmbim dhuratash me rastin e vizitave të delegacioneve të huaja në Kosovë dhe vizitave zyrtare të FFK-së me organizatat partnere”.
Reagimi nga Federata e Futbollit e Kosovës:
“Federata e Futbollit e Kosovës reagon ndaj shkrimit tendencioz të portalit ‘Paparaci’, me titull “Tetë ditë para Kuvendit Zgjedhor, FFK-ja blen 35 orë dore”.
Sqarojmë opinionin se ky artikull është i pavërtetë dhe qëllimkeq, me synim për ta dëmtuar imazhin e institucionit tonë në prag të procesit zgjedhor.
FFK as nuk ka blerë dhe as nuk ka zhdoganuar kurrëfarë orësh, prandaj kërkojmë edhe nga Dogana e Kosovës të reagojë në lidhje me deklaratën e zëdhënësit të saj Adriatik Stavileci, e cila ka gjasa që është keqpërdorur nga portali në fjalë, siç e ka keqintepretuar edhe përgjigjen e Zyrës për Media të FFK-së.
Tash e sa kohë FFK ka qenë në shënjestër të orkestrimeve të disa individëve dhe grupeve të interesit, por as kjo trysni nuk do të mund ta ndryshojë vullnetin e komunitetit të futbollit.
FFK do të vazhdojë fuqishëm ta ndjekë rrugën e drejtë dhe do të punojë me përkushtim edhe më të madh në zhvillimin e hovshëm të futbollit në Kosovë”. /Gazeta Express/