Janë shtuar forcat e Policisë së Kosovës në veri pas të shtënave me armë që ndodhën mëngjesin e sotëm në drejtim të policisë në Zupç të Zubin Potokut, shkruan Gazeta Sinjali.
Njësia Speciale ndodhet në Lagjen e Boshnjakëve në Mitrovicë ku po kryen bastisje.
Rastin e ka konfirmuar Baki Kelani, i cili ka thënë se nuk raportohet për të arrestuar në këtë aksion por vetëm për bastisje.
“Policia e Kosovës, në këtë rast departamenti i hetimeve ka realizuar një operacion policor në Mitrovicë, konkretisht në lagjen e Boshnjakëve. Gjatë këtij operacioni policorë është kryer bastisje në një lokacion. Nuk raportohet për të arrestuar, përderisa dy personave iu është lënë ftesë për paraqitje në Policinë e Kosovës, mbi dyshimin e bazuar për ndihmë në kryerjen e veprës penale”, ka thënë Kelani.
Forca të shtuara të Policisë ka edhe në Zupç, aty ku ka ndodhur sulmi në orët e mëngjesit të ditës së martë.
Policia e Kosovës është sulmuar sot me armë zjarri në fshatin Zupçe të Zubin Potokut. Ky është sulmi i pestë me radhë në javët e fundit në drejtim të Policisë kufitare të Kosovës.
Sulmi i fundit ishte raportuar më 16 prill.