Ministri i Administrimit të Pushtetit Lokal, Elbert Krasniqi ka deklaruar mbrëmë në një emision televiziv se janë disa fshatra që kanë bërë kërkesë për tu bërë komuna.
“Në Ministrinë e Administrimit të Pushtetit Lokal janë paraqitur 19 kërkesa për themelimin e komunave të reja, për të cilat MAPL ka njoftuar Qeverinë e Republikës së Kosovës. Kërkesat e adresuara përmbajnë një përshkrim sipërfaqësor dhe nuk thellohen në tedhëna si numrin e banorëve, arsyeshmërinë ekonomike, si dhe shumë elemente të tjera që janë të domosdoshme për themelimin e komunave të reja.
Disa nga këto komuna janë:
- Zhegër – Komuna Gjilan
- Vitomiricë – Komuna e Pejës
- Orllan – Komuna e Podujevës
- Runik – Komuna e Skënderajt
- Zym – Komuna e Prizrenit
- Krushë e Madhe – Komuna e Rahovecit”, thuhet në pëgjigjen e MAPL-së.Indeksonline ka kërkuar nga ministria e Krasniqit për procedurat ligjore që duhet ndjekur një fshat për tu bërë qytet.
“Ligji Nr. 03/L-041 “Për kufijtë administrativ të komunave” parashikon në nenin 10 Mënyrat e Ndryshimit të Kufijve administrativ të Komunave dhe më konkretisht Ndryshimi i kufijve administrativ të komunës bëhet me:
a) bashkimin e një apo më shumë komunave me një komunë ekzistuese;
b) bashkimin e dy apo më shumë komunave për formimin e një komune të re;
c) me ndarjen e një pjese të një komune (apo komunave) për t`iu bashkuar me një komunë tjetër;
d) me ndarjen e një pjese të një komune apo komunave për formimin e një komune të re.Gjithashtu Neni 11 përcakton përmbajtjen e propozimeve dhe dokumentet mbështetëse për ndryshime të kufijve administrativ të cilat duhet të përfshijnë së paku:
a) hartën e territorit apo territoreve, kufijtë administrativ të cilave propozohen të ndryshohen, duke specifikuar kufijtë administrativ e rijnë të propozuar;
b) arsyetimin për nevojën e ndryshimeve të tilla dhe lehtësimin ose vështirësimin e qasjes së qytetarëve në shërbime të ofruara nga komuna;
c) analizën e efekteve të ndryshimit në aspekt të qëndrueshmërisë ekonomike të komunës” thuhet në përgjigjen e MAPL-së.Ministria e Elbert Krasniqi ka treguar për Indeksonline emrat e disa fshatrave që kanë ribërë kërkesë për tu bërë komuna.