Ballkani arriti që të kualifikohej në grupet e Conference League. Një arritje historike kjo e ekipit të Ilir Dajës që doli për herë të parë në Europë.
Dhurata nuk ka munguar për trajnerin shqiptar. Në bazë të marrëveshjes së bërë më herët, presidenti i Ballkanit i ka ofruar 100 mijë euro Ilir Dajés në rast të kalimit në grupet e Conference League.
Kjo është zbuluar nga gazetari Arlind Sadiku në emisionin Dueli Sportiv, ndërsa trajneri vlerësohet edhe me anën monetare për punën e jashtëzakonshme.
Veç arritjes në grupe për herë të parë, Ballkani tanimë do duhet të mbajë edhe “xhevahirët” e ekipit. Në drejtim të lojtarëve të klubit nga Suhareka ka pasur shumë kërkesa, me Albion Rrahmanin që është i preferuari.
21 vjeçari nga Podujeva ka shkëlqyer në Europë, me Dajën që i besoi majën e sulmit. 7 golat në gjashtë ndeshje nuk kanë mbetur pa u vënë re, me interesin që është i lartë për të.
Mësohet se klubi belg i Beerschot ka kërkuar informacion për sulmuesin e Kosovës U-21, teksa menaxheri Kastriot Telaku e konfirmon, duke shtuar se janë disa skuadra që duan shërbimet e sulmuesit.