Ballkani është mundur në udhëtim në Çeki nga Slavia Pragë, me rezultat 3-2, sfidë që sapo u mbyll.
Slavia Pragë dhe Ballkani u ballafaquan në kuadër të xhiros së dytë në Grupin G në Ligën e Konferencës.
Kampioni i Kosovës, në duel me Slavia Pragë bëri paraqitje mjaft të mirë përball një skuadre që ka përvojë shumë të madhe në arenën ndërkombëtare.
Fraksioni i parë mes skuadrës çekë dhe skuadrës sonë, ka prodhuar një sfidë tejet interesante me pesë gola të shënuara.
Ballkani dy herë ishte në epërsi përmes Ermal Krasniqit (24’) dhe Meriton Korenicës (29′), por nikoqirët ia dolën të përmbysin avantazhin e skuadrës sonë me golat e Jurasek (26’), Olaynika (34’) dhe Masopust (41’).
Lojë dinamike është luajtur edhe në pjesën e dytë. Slavia kishte dominim të lehtë në terren, duke krijuar disa raste të mira, por ‘gardiani’ i skuadrës sonë Stiv Frashëri intervenoi mjaft mirë duke shpëtuar portën tonë.
Futbollistët e Ballkanit tentuan që të gjejnë golin e barazimit, por tentimet e tyre nuk dolën të jenë të suksesshme. Ballkani në finish të ndeshjes kundër Slavia Pragë, luajti më një lojtarë më pak pasi Astrit Thaqi u ‘skuq’ pas një ndërhyrje ndaj një lojtari të skuadrës çekë.
Slavia Pragë mund skuadrën nga Suhareka, edhe pse skuadra jonë shfaqi performancë mjaft të mirë.
Kjo është disfata e parë e Ballkanit në fazën e grupeve në Ligën e Konferencës, derisa në ndeshjen e parë barazoi me Cluji (1-1) në ‘Fadil Vokrri’.