Mitrovicë- Inspektori i ndërtimit në Komunën e Skenderajt, Zenë Rushiti, në mungesë të provave është liruar nga akuza për veprën penale “Keqpërdorimi i pozitës apo autoritetit zyrtar”.
Aktgjykimi u shpall të mërkurën, nga kryetari i trupit gjykues, gjyqtari Radosllav Markoviq, raporton “Betimi për Drejtësi”.
Gjyqtari Markoviq deklaroi se trupi gjykues ka ardhur në këtë përfundim, nga mungesa e provave për të vërtetuar përtej dyshimit të bazuar se i akuzuari ka kryer veprën penale për të cilën akuzohej.
Ndaj këtij aktgjykimi, palët kanë të drejtë ankese në Gjykatën e Apelit, në afat prej 15 ditësh nga dita e pranimit të këtij aktgjykimi me shkrim.
Gjyqtari Markoviq njoftoi se në aktakuzë thuhet se “i akuzuari nuk kishte ndërmarrë masa për ndalimin e mbindërtimeve të objekteve”, ndërsa sipas provave gjatë shqyrtimit gjyqësor është vërtetuar se i njëjti ka qenë në vendin e ngjarjes, e ka përpiluar procesin për të katër rastet për të cilat akuzohet, si dhe ka ndërmarrë veprimin e informimit të shefit të tij, drejtorit të Inspekcionit, ndërsa ky i fundit kishte marrë vendim që të ndërpriten punimet, të merret leja për ndërtim, apo të rrënohen objektet në fjalë.
Prokuroria Themelore në Mitrovicë, më 31 janar 2019 kishte ngritur aktakuzë ndaj të pandehurve Zenë Rushiti, Rrustem Rukolli, Abaz Abazi, Muhamet Fejza dhe Idriz Mecinaj.