Konflikti për pronë në rrugën “Presheva” në Skenderaj, ka çuar në mosmarrëveshje dhe kanosje serioze ku u përfshinë dy familje, raporton Gazeta Sinjali.
Rasti ka ndodhur të premten, kur edhe u denoncua nga një 49-vjeçar, i cili kërkoi ndihmën e Policisë pasi mori një thirrje ku u kërcënua me vrasje.
Burimet nga Prokuroria bëjnë me dije se ky është rasti i dytë i denoncuar nga viktima, i cili është në hall me familjen Shaqiri. Njëri nga anëtarët e kësaj familje dyshohet se e ka kërcënuar ditën e djeshme duke i thënë “Largohu se për 10 min vi e t’vras”.
Motivi i këtyre rasteve dyshohet të jetë mosmarrëveshja për pronë mes dy palëve. Viktima u kërcënua pikërisht në kohën sa ishte duke kryer punime në tokën e tij.
Përballë kësaj situate, viktima ka kërkuar sërish ndihmën e Policisë. Denoncimi i tij aktivizoi njësitet policore, me ç’rast i dyshuari u shpall në kërkim.
Pas disa orësh tre anëtarë të familjes Shaqiri u arrestuan dhe u shoqëruan në stacion policor. Me rastin e kontrollit policor, te njëri nga të dyshuarit u gjet edhe një armë që u konfiskua.
Me urdhër të Prokurorit të Shtetit ndaj tyre është lëshuar aktvendim për ndalim prej 48 orësh.