Këtë ka arritur ta mësojë Nacionale përmes burimeve të veta.
“Ministrja Haxhiu tashmë është njoftuar nga ne për pamundësinë që ajo të udhëtojë. Kjo është bërë vetëm para pak çastesh”, tha një burim pranë Ambasadës Amerikane për Nacionalen.
Ky refuzim i vizitës vie pas kërkesave të vazhdueshme të autoriteteve ndërkombëtare për shtyrje të vendimit për targa, vendim ky që ka prodhuar zhvillimet e fundit.
Në anën tjetër, ishte Reporteri.net, që jo shumë kohë më parë shkroi rreth kësaj çështjeje.
Sipas mediumit gjegjës, ambasadori Hovenier në një takim me gazetarë ka folur rreth kërkesës së Haxhiut për vizitë, duke shtuar se një gjë e tillë ka qenë e pamundur.
“Kjo këtu është enigmatike. Janë dy çështje. Nuk shoh asnjë rrethanë në të cilën do të ishte e vështirë për qeverinë e ShBA’së të lëshonte vizë për një ministër të Qeverisë së Kosovës. S’mund të flas për rastet specifike ose individuale të vizave, por nuk jam në dijeni për ndonjë rrethanë ku një ministër i qeverisë nuk do të kualifikohej për marrjen e vizës për punë zyrtare”, ka thënë ambasadori Hovernier në një bisedë me disa gazetarë të pritur në Ambasadën Amerikane në Prishtinë”.
Veç kësaj ai shtoi se momentalisht nuk është koha për të udhëtuar, kjo për shkak të krizës në të cilën gjendet vendi.
“Ne aktualisht jemi në një krizë, dhe është pikëpamja jonë që, ne jemi tejet të përqendruar në këtë krizë, besojmë që edhe kjo qeveri është e përqendruar në këtë krizë, dhe mendojmë se nuk është koha mbase domosdoshmërisht më e duhura që ministrat të jenë duke udhëtuar për në ShBA për takime zyrtare duke e pasur parasysh krizën të cilën duhet trajtuar këtu. Dhe këtë po ua komunikojmë zyrtarëve të ndryshëm në qeveri”
Gjatë ditës ndërkaq, shefi i kabinetit të Haxhiut, përmes rrjetit social “Facebook” tentoi t’i mohojë lajmet rreth një refuzimi potencial, pasi zërat për një gjë të tillë veçse qarkullonin.
“Me ftesë të autoriteteve Amerikane, në muajin dhjetor të këtij viti, Ministrja Haxhiu planifikon një vizitë zyrtare në Shtetet e Bashkuara të Amerikës, gjatë së cilës vizitë do të ketë takime zyrtare me përfaqësues të Departamentit të Shtetit Amerikan, Departamentit për Drejtësi dhe institucione të tjera”, shkruante ai gjatë ditës.
Por, pa shkuar shumë kohë, Ambasada Amerikane përgënjeshtroi Nimonin, duke thënë se tashmë gjithçka është e ditur. Albulena Haxhiu do ta ketë të pamundur udhëtimin në ShBA.
Veç dialogu
Pas zhvillimeve që i parapriu protesta e serbëve në veri, si kundërshtim ndaj Qeverisë së Republikës së Kosovës për përjashtimin e Nenad Gjuriq, drejtor i Drejtorisë së Policisë së Kosovës për rajonin e veriut, pati reagime të shumta.
Një prej tyre ishte edhe i Shefit të Diplomacisë së Bashkimit Evropian, Josep Borrell.
Spanjolli kërkoi nga palët që t’i zbatojnë marrëveshjet e dakorduara në Bruksel, kurse serbëve u bëri thirrje që t’u kthehen pozitave që i ushtronin deri më tani.
“Tërheqja e serbëve të Kosovës nga institucionet e Kosovës nuk është zgjidhje e mosmarrëveshjeve aktuale. Ajo ka potencialin për të përshkallëzuar më tej tensionet në terren. Ne i bëjmë thirrje Serbisë dhe përfaqësuesve të serbëve të Kosovës që të respektojnë obligimet e tyre të Dialogut dhe të kthehen në institucionet e Kosovës për të përmbushur detyrat e tyre, duke përfshirë policinë, gjyqësorin dhe administratat lokale”.
“Në të njëjtën kohë, BE-ja përsëri u kërkon autoriteteve të Kosovës që të respektojnë detyrimet e tyre pa vonesë. Kjo nënkupton zgjatjen e menjëhershme të procesit të riregjistrimit të automjeteve dhe pezullimin e çdo veprimi ndëshkues ndaj mbajtësve të targave KM. Çështja e targave mund të zgjidhet nga Palët në kuadër të Dialogut. BE-ja gjithashtu i bën thirrje Kosovës që të fillojë menjëherë hapat për themelimin e Asociacionit/Bashkësisë së Komunave me Shumicë Serbe. Kuvendi i Kosovës ka ratifikuar Marrëveshjen e Brukselit dhe Gjykata Kushtetuese e Kosovës ka vendosur që Asociacioni/Bashkësia duhet të krijohet. Prandaj, themelimi i saj është obligim ligjor për Kosovën. Dështimi i vazhdueshëm për të zbatuar këtë obligim cenon parimin e sundimit të ligjit dhe dëmton reputacionin dhe kredibilitetin e Kosovës”, thuhej ndër të tjerash.