Bedel quhej njeriu që zëvendësonte dikend në ushtri. Pra, që kryente ushtrinë për dikend tjetër!
Shkruan: Hysni Mehani
Sot, sërish ka bedelë, bedelët e burgut! Drejtorët e drejtorive komunale janë bedelët e kohës sonë. Pra, ata që nënshkruajnë, dënohen dhe shkojnë në burg në rast nevoje për interesat e kryetarit. E, që bedelët të jenë sa më të suksesshëm, duhet të zgjedhen të atillë që nuk kanë çfarë të humbasin! Të atillë që tashmë kanë vepra penale të dëshmuara, dhe çdo vepër penale më shumë pasuron sirtarin e tyre penal. Ose të atillë që PDK i ka shpëtuar nga veprat penale në të kaluarën dhe kryerja e ndonjë vepre penale gjatë këtij mandati do të ishte larje e borxhit ndaj PDK-së.
Ruaju nga ata që nuk kanë çfarë të humbasin! – thotë populli. E të tillë janë disa nga drejtorët e “rinj” komunalë. Madje njëri prej tyre akuzohet se kishte vjedhur 450 fletvotime përnjëherë. Një tjetër u kthye në komunë pas një aventure të suksesshme drejt falimentimit të postës. E një tjetër kthehet në vendin e krimit pas 4 viteve për të vazhduar aty ku e kishte lënë.
#Vazhdojmëatykuelamë kishin moton. Nuk na gënjyen mbase për herë të parë! Do vazhdojnë aty ku e lanë!
Mua nuk më befasonjë aspak këto emërime të njerëzve me precedan penal. Kush ka pritur diçka tjetër, ta kërkojë fajin tek pritshmëritë e tij!
Jam i prirur të gjykoj në rrafshin e punëve që do të bëjnë tash e tutje. Ka edhe drejtorë që nuk shquhen për të kaluar të errët. Por, më rëndësishme se çfarë përfaqësojnë, është kujt i shërbejnë.
Të gjithë atyre që na kanë kritikuar pse nuk reagojmë për këto emërime, duhet t’iu themi se; zgjedhjet i ka fituar PDK-ja, mënyrën se si i ka fituar e dijnë qytetarët! Nëse zgjedhjet i ka fituar PDK-ja, pse duhet të reagojmë ne, kur ajo nxjerrë ta udhëheqin ata që e përfaqësojnë më së miri atë. Paçka se ata kanë vepra penale! Tenxherja e ka gjetur kapakun. – thotë populli.
E keqja më e madhe është se këtu në Skënderaj edhe kryetari është bedel.
Por, kryebedeli i sotëm në Skënderaj që quhet kryetar i komunës deri tash ka operuar suksesshëm, sepse kanë shkuar nëpër gjykata e janë dënuar vetëm ish drejtorët e drejtorive. Kryebedeli thuhet se ka një proces gjyqësor, për një proces të ngjashëm do t’i shkarkonte bedelët vartës, sepse ata janë të emërur dhe ky është bedel i zgjedhur. Pra, e quan veten bedel imun!
Thellë, thellë, ndjej keqardhje për kryebedelin në Skënderaj! Sepse, të gjitha të arriturat jetësore i ka falë atij. Falë atij që vazhdimisht e mban si kryebedel, dhe ky, duket mos qenë në gjendje të bëjë diçka me forcat e tija, ndjehet i lumtur me pozicionin e kryebedelit.
Kryebedeli në Skënderaj është sinonimi i servilitetit. Por, kryebedel i suksesshëm, sepse ende nuk është bërë bedel. Duket paradoks, por ja që kështu e ka bedeli!
I thirrur për t’u bërë bedel, porse sa më gjatë që nuk bëhet bedel me letra mbetet në skenë. Pikërisht në momentin që bëhet bedel, merr fund.
Për bedelin nuk ekziston akti final e as çasti sublim! Bedelët e burgut janë të dënuarit përhershëm!E, kur po mendonim që epoka e bedelit duhej të harrohet, e të vinte koha e progresit e demokracisë të njëmendtë!
Dikush u përkujdes për të na treguar që nuk ka vetëm bedel, ka edhe kryebedel.
E jo vetëm që ka kryebedel, por që ka kryebedel që për çdo të arritur në jetë falët atij!
Jemi kthyer shumë mbrapa me logjikën qeverisëse, drejtorët me vepra penale janë maja e ajsbergut.