Kryetari i inciativës “Ideal” dhe ish kryetari i Komunës së Skenderajt, Bekim Jashari, sot me rastin e ditës ndërkombëtare të personave me nevoja të veçanta ka bërë thirrje tek institucionet qendrore që kjo kategori të këtë një vëmendje më të madhe institucionale, trajtim dinjitoz, kushte të favorshme të trajtimit dhe rehabilitimit si dhe punësim të tyre, raporton rajoni.org.
“Jam shumë i lumtur që pavarësisht veshtirësive dhe limiteve buxhetore gjatë qeverisjes sime kam arritur që të përkrahim dhe të realizojmë e fillojmë projekte konkrete jetësore për këtë katergori”, ka thënë Jashari.
Postimi i plotë:
Sot, me rastin e ditës ndërkombëtare të personave me nevoja të veçanta dua të bëjë thirrje tek institucionet tona qendrore që kjo kategori të këtë një vëmendje më të madhe institucionale, trajtim dinjitoz, kushte të favorshme të trajtimit dhe rehabilitimit si dhe punësim të tyre, sepse edhe ata sikurse ne janë pjesë e kësaj shoqërie dhe mund t’i kontribuojnë asaj.
Jam shumë i lumtur që pavarësisht veshtirësive dhe limiteve buxhetore gjatë qeverisjes sime kam arritur që të përkrahim dhe të realizojmë e fillojmë projekte konkrete jetësore për këtë katergori.
Javë me parë falë bashkëpunimit me shoqatën “Qendresa Kosovare” kemi filluar ndërtimin e qendrës model për personat me nevoja të veçanta e cila do të krijojë mundësi trajtimi e rehabilitimi si dhe krijim të të ardhurave për këtë qendër përmes lokaleve afariste brenda saj. Uroj dhe shpresoj që ky projekt të mbështetët edhe nga qeverisja e tanishme dhe kështu të përfundojë sipas planifikimeve brenda 6 muajve.
Po ashtu në realizim e sipër është edhe projekti për punësimin e kësaj kategorie, ku krahas trajnimeve profesionale do të ndahen edhe grante për persona me nevoja të veçanta si dhe për biznese që punësojnë qytetar nga kjo kategori sociale.
Krahas këtyre projekteve kam nënshkruar edhe marrëveshjen me MAPL-në për bashkëfinancimin e projektit “Krijimi i kushteve infrastrukturore për personat me nevoja të veçanta”, i cili përfshin ndërtimin e parkut për këtë kategori pranë gjykatës dhe sheshit “Adem Jashari, ndërtimin e shtegut sinjalizues për personat e verbër në sheshin “Adem Jashari”, instalimin e sinjalistikës në semafora për personat e verbër si dhe rregullimin e çasjeve në shesh dhe në hapësirat e Qendrës së Kulturës “Hasan Prishtina” në Skenderaj.
Kështu me mbështetje konkrete dëshmojmë angazhimin tonë për secilën kategori të shoqërisë sonë.
Bashkë!
