Burrat kosovarë shpesh herë bien në telashe me ligjin për shkak të këmbëngulësisë së tyre për të bërë sërish për vete ish-partneret, të cilët përmes kërcënimeve dëshirojnë t’i detyrojnë ato që të veprojnë kundër vullnetit të tyre, raporton Gazeta Sinjali.
Një rast i tillë është raportuar mbrëmë në Gjakovë, ku një burrë dyshohet se ka kërcënuar një 34-vjeçare, me të cilën ishte në lidhje dashurie një kohë.
Sinjali mëson se 28-vjeçari dyshohet se vazhdimisht e kërcënonte përmes mesazheve në rrjete sociale, duke i kërkuar asaj që të vazhdojnë lidhjen dhe të kenë marrëdhënie seksuale dy herë në javë.
Në të kundërtën, ai e ka kërcënuar se do t’ia mbysë fëmijët. Përballë kësaj situate e cila ka ngjallur frikë e shqetësim te 34-vjeçarja, ajo ka kërkuar ndihmën e Policisë së Kosovës. Para hetuesve policorë, viktima ka rrëfyer gjithçka lidhur me ngjarjen.
Njësitë policore kanë arritur që të arrestojnë personin e dyshuar, i cili është shoqëruar në stacion policor për intervistim. Me urdhër të prokurorit, ndaj tij është iniciuar rasti ‘Kanosje’ dhe i njëjti është dërguar në mbajtje për 48 orë.