Kryetari i SkenderajFadil Nura e nënkryetari Sami Lushtaku, të shoqëruar nga drejtori i Urbanizimit Driton Mulaj e ai i Arsimit Kastriot Duraku, kanë vizituar punimet që po zhvillohen në objektin e vjetër të Gjimnazit “Hamëz Jashari”, pas konstatimit se punimet nuk janë duke u kryer sipas standardeve të kërkuara, shkruan rajoni.org.
Sot po ashtu, Komuna e Skenderajt ka organizuar një takim me përfaqësues të kompanisë mbikëqyrëse dhe me Fondin Kosovar të Efiçiencës, ku punëkryesit i janë bërë të ditura lëshimet gjatë punimeve rreth fasadimit. Me këtë rast, është kryer edhe një vizitë inspektuese në gjimnazin e qytetit, për të parë nga afër defektet. Pas konsultimeve ndërmjet palëve, janë ndërmarrë masat e duhura, që të sanohet çdo defekt i paraqitur.
Në Gjimnazin “Hamëz Jashari” janë duke u zhvilluar punimet e rinovimit të tërësishëm, me ndërrim të kulmit, izolim të jashtëm sipas standardeve, ndërrim të dyerve e dritareve, ngrohjeve dhe rregullime të tjera.
