Kryetari aktual i komunës së Skenderajt, Fadil Nura ka shkelur premtimin e dhënë para qytetarëve të komunës së Skënderaj, shkruan portali rajoni.org.
Po bëhet fjalë për premtimin e tij në kategorinë e taksave, ku ka thënë që nuk do t’i rrisë taksat e tarifat, bile jo rritje por ai ka thënë që do t’i zvogëlojë krejt nëse thirremi saktësisht në atë që ka premtuar në fushatë.
Me propozimin e tij, asambleja komunale në seancën e fundit vetëm me votat e partisë së tij pra të PDK-së ka miratuar propozimin për ndryshimin e rregullores për taksa e tarifa, në të cilën mes të tjerash parashihet edhe ngritja e çmimit për mbledhjen e mbeturinave për ekonomitë familjare, ndërmarrjet ekonomike etj.
Lidhur me këtë shtrenjtim ka reaguar asamblisti i Ideal-it, Naser Bajraktari, i cili ka thënë se ky shtrenjtim nuk është analizuar mirë sepse siç ka thënë ai kompania që merret me këto shërbime ka 450 mijë euro të hyra vjetore.
“Unë kam vizituar kompaninë “Uniteti” në Skënderaj, që merret me grumbullimin e mbeturinave.”, – ka thënë Bajraktari.
“Sipas asaj që kam parë, aty 300 mijë grumbullohen vetem nga ekonomitë familjare dhe 150 mijë nga bizneset dhe institucionet komunale që d.m.th. 450 mijë.”, -ka vazhduar Bajraktari, sipas të cilit deri më tani drenicasit kanë paguar tarifën më të shtrenjtë për heqjen e mbeturinave.
Bajraktari ka kërkuar që kompanisë në fjalë t’i bëhet një auditim që të dihet saktësisht se ku është problemi i këtij keqmenaxhimi./Rajoni.org/