Familja Hajrizi nga Klina e Ulët, për ndryshe e Faton Hajrizit, demanton lajmin e dhënë dje në disa medie të shkruara lidhur me përfshirjen e një familjari të tyre në rastin e dhunimit të një plake 70-vjeçare në Skënderaj, shkruan portali Rajoni.org.
Përfaqësuesi i familjes Hajrizi ka kontaktuar me Rajonin, duke dërguar një letër me sqarimin e plotë për rastin e keqkuptimit.
Edhe ne si medie elektronike, në emër të redaksisë së portalit i kërkojmë falje publike familjes Hajrizi. Atëbotë, lajmi i publikuar nga Rajoni, ka qenë i përcjellë nga mediet e tjera. Gjithashtu, në fund të atij lajmi ka qenë i cituar burimi i informatës, në këtë rast emri i asaj gazete.
Fjala e plotë e familjes Hajrizi:
“Ne si familje jemi mjaft të indinjuar lidhur me rastin që është dhënë mbrëmë për gjoja përfshirjen e një familjari tonë në rastin e shëmtuar që i ka ndodhur një të moshuare. Nga organet e drejtësisë kërkojmë, që sa më shpejt të zbardhet rasti i kësaj plake si dhe të hetohet qëllimi i plasimit në opinion implikimi i familjes sonë, respektivisht të familjarit tonë, i cili është duke treguar shembull për të mirë në institucionin ku gjendet.
Lakimi i emrit të familjes sonë në këtë rast na ka shkaktuar trauma të mëdha familjare dhe nga mediet që kanë publikuar këtë info të pasaktë kërkojmë që të dalin publikisht me kërkimfalje ndaj familjes.
Me respekt,
Mustafë Hajrizi”