Kryetari i qendrës se Lëvizjes Vetëvendosje në Skenderaj, Hysni Mehani, me anë të një njoftimi në rrjetin social facebook ka thënë se ka fituar rastin përball familjarëve të nënkryetarit të degës se PDK’së në Skenderaj, raporton rajoni.org.
Ai thotë se puna e tij si këshilltar komunal, e si qytetar; është të shkatërroj sa më shumë imazhe dhe të shkaktoj sa më shumë dëme për ata që e keqpërdorin detyrën zyrtare dhe përftojnë duke abuzuar me nevojat e qytetarëve.
Postimi i plotë i Mehanit në facebook:
E vërteta në ballë, e shoku Berat A. Ganiqi në krah, e fituan rastin!
Për disa muaj rresht, jam ballafaquar me akuza të orkestruara se ua kam dëmtuar imazhin dhe u kam shkaktuar humbje të mëdha.
Puna ime si këshilltar komunal, e si qytetar; është të shkatërroj sa më shumë imazhe dhe të shkaktoj sa më shumë dëme për ata që e keqpërdorin detyrën zyrtare dhe përftojnë duke abuzuar me nevojat e qytetarëve.
Më akuzonin familjarët e nënkryetarit të PDK-së, ata i përfaqësonte në gjykatë një avokat që ishte vëlla i një asamblisti të PDK-së. Ndërsa mua, mua më mbronte shoku Berat! Ata kërkonin shumë para, dhe me shumë gjasë edhe avokati kishte hisen e tij.
Ndërsa mua më mbronte një shok! Normalisht pa asnjë kompensim!
Ata kanë familjarë dhe para, shumë para!
Ne kemi shokë dhe shoqe, dhe çdo herë të vërtetën në ballë.
