Ish-gjyqtari Rafet Ismaili nga qyteti i Skenderajt dhe ish-polici Blerim Gashi janë dënuar nga Gjykata Themelore në Prishtinë, Departamenti Special me nga 20 muaj burg dhe me nga 1 mijë euro gjobë pasi u shpallën fajtorë për veprën penale të “Ushtrimit të ndikimit”, e cila është njëra nga veprat penale të korrupsionit, raporton Gazeta Sinjali.
Pas shfrytëzimit të të drejtës për ankesë dhe marrjes së akgjykimit të Gjykatës së Apelit, me të cilin ishin refuzuar ankesat e parashtruara kundër aktgjykimit të Gjykatës Themelore, ata kishin parashtruar kërkesë për mbrojtje të ligjshmërisë në Gjykatën Supreme, kërkesë kjo e cila është refuzuar, mëson Sinjali.
Në vendimin e siguruar nga Sinjali thuhet se kolegji në përbërje nga gjyqtarët Nesrin Lushta, Agim Maliqi dhe Rasim Rasimi, më datën 28 korrik ka marrë aktgjykim me të cilin ka refuzuar si të pabazuara kërkesat për mbrojtje të ligjshmërisë të cilat ishin paraqitur kundër aktgjykimit të Gjykatës Themelore në Prishtinë dhe atij të Gjykatës së Apelit.
Ish-gjyqtari Ismaili u shpall fajtor nga Gjykata e Prishtinës në lidhje me akuzën se kishte marrë 1,500 euro nga dëshmitari F.Z. me qëllim që të ndikonte në kryetarin e Gjykatës së Mitrovicës për shtyrjen e ekzekutimit të dënimit.
Ndërsa ish-polici Blerim Gashi u dënua pasi Gjykata vlerësoi se i kishte marrë 1,000 euro nga i njëjti dëshmitar me qëllim që të ndikonte tek një gjyqtar i Gjykatës Supreme.
Kujtojmë se përpos dënimit me burgim, ndaj tyre u shqiptua edhe dënimi plotësues i cili ua pamundëson punën në Administratën Publike për dy vite.