Edhe pse rastet e lëndimeve të punëtorëve në vendet e punës nuk janë të rralla, kushtet nëpër kompanitë private po vazhdojnë të jenë të këqija, e ku prej të cilave po pësojnë më së shumti punëtorët. Kështu ka ndodhur edhe dje në Prishtinë, ku një punëtor humbi jetën tragjikisht në vendin ku punonte, raporton Sinjali.
Një ditë pas këtij rasti të trishtë, në Policinë e Kosovës është raportuar edhe një rast i lëndimit të një personi në vendin ku kishte shkuar për t’ia filluar punës, në fshatin Likoc të Skenderajt.
Burimet e Sinjalit brenda QKUK-së kanë bërë të ditur se bëhet fjalë për një të ri, i cili është lënduar në një fabrikë, ku sot kishte shkuar për ta shikuar vendin e punës dhe për të filluar punën, në vend të vëllait të tij. Për pasojë, i riu ka marrë lëndime në krah, për çka fillimisht është trajtuar në Skenderaj, e më pas në Qendrën Klinike Universitare të Kosovës.
Sipas burimeve nga Emergjenca, viktima fatmirësisht është jashtë rrezikut për jetë.
Lidhur me këtë rast, Sinjali mëson se tashmë hetimet kanë nisur nga Inspektorati si dhe nga Policia, ndërkohë që me urdhër të Prokurorit të Shtetit është iniciuar rasti “asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”.