Kryeministri i Kosovës, Albin Kurti, ka kërkuar ndihmën e SHBA-së për anëtarësimin e Kosovës në NATO. Ai këtë kërkesë ia ka parashtruar Zëvendës-Sekretares amerikane të Shtetit, Karen Donfried, përgjatë një takimi që pati me të dhe të dërguarin special të SHBA-së për Ballkanin Perëndimor, Gabriel Escobar.
Kurti një gjë të tillë e ka bërë të ditur nëpërmjet një konference të përbashkët për media me Donfried, duke thënë se Kosova ka nevojë për ndihmën e aleatëve që të bëhet pjesë e Këshillit Evropian, si dhe programit të Partneritetit për Paqe në kuadër të NATO-s.
“Republika e Kosovës duhet të anëtarësohet në Këshillin e Evropës dhe të bëhet pjesë në Programin e Partneritetit të Paqes në NATO dhe për këtë, natyrisht po përgatitemi, por edhe e kërkojmë ndihmën e aleatëve tanë”, ka deklaruar ai.
Kurti ka folur edhe për rreshtimin e Serbisë kah Rusia, teksa ka vazhduar ta quajë despotike diplomacinë e Kremlinit.
“Jo të gjitha shtetet e Ballkanit Perëndimor ka vepruar njëjtë. Kemi refuzuar e Serbisë për ta sanksionuar Rusinë dhe për t’u distancuar nga ajo, mund të ketë qenë një qëndrim i pritshëm por asessi i mirëkuptueshëm”, ka thënë Kurti.
“Kosova do të mbetet aleat i besueshëm për SHBA-në, një i tillë që nuk pyet pse por si, jo sa por kur”, ka thënë kreu i ekzekutivit, teksa ka folur për partneritetin Kosovë-SHBA.