Nuk janë të rralla rastet kur qytetarët marrin vetura me qira dhe shkelin marrëveshjet që bëjnë me bizneset për shfrytëzimin e tyre. Shpesh ato automjete shiten, ose ‘zhduken’, çka i detyron pronarët e kompanive të kërkojnë ndihmë nga Policia. Kështu ka ndodhur edhe në një ‘Rent a Car’ në Prishtinë, për çka një person është arrestuar dhe tashmë ndodhet nën masën e ndalimit.
Burimet nga Prokuroria kanë bërë me dije se i dyshuari për këtë rast është Shemsi Abduallahu, 50-vjeçar, i cili po dyshohet se nuk e ktheu veturën pas dy ditësh, ashtu siç ishte marrë vesh me pronarin e kompanisë.
Si rezultat i raportimit të rastit, i dyshuari është arrestuar dhe ndaluar për 48 orë dhe ndaj tij, me urdhër të prokurorit të Shtetit është iniciuar rasti si “Mashtrim”.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata