Ish-komandanti i UÇK-së, Naser Shatri gjatë ditës së djeshme është dërguar në stacionin policor në Istog, shkruan GazetaDemos.
Ai për GazetënDemos tha se arsyeja e kësaj ndalese ishte dyshimi se i njejti kishte shtën me armë mbi një person nga vetura e tij teksa ishte në lëvizje.
Shatri tha se dyshimi i ngritur mbi të ishte ndaj ish-shefit të milicisë serbe në Rakosh, inicialet e të cilit janë ZH.ZH.
“Dyshimi ishte qitje ndaj një personi të njohur për policinë, ish shef i milicisë serbe në Rakosh, me inicialet ZH.ZH”, tha Shatri për Demos.
Gjithashtu tregoi se pas ekzaminimit ndaj tij dhe veturës së tij është liruar nga stacioni i Policisë së Istogut.
Kujtojmë se rastin e ka konfirmuar dje edhe zëdhënësi i Policisë për rajonin e Pejës, Fadil Gashi.
“Sot me datë 31.05.22 rreth ores 11 :42 viktima përmes telefonit ka raportuar në polici se derisa ishte duke lëvizur këmbë në rrugën Nënë Tereza në Istog, në afërsi të tregut të gjelbertë, derisa ka kaluar një veturë sipas viktimës dyshohet se një person nga kjo veturë të ketë shtënë me armë zjarri në drejtim të tij/viktimës. Viktima nuk është qëlluar dhe nuk ka lendime, ne vendngjarja ka dalur te gjitha njesite relevante te policise si dhe hetimet rajonale. Deri tani në vendngjarje nuk është gjetur ndonjë dëshmi dhe nuk dihet çfarë armë mund të jetë përdorur”, tha Gashi.
Ai tha se me të marrë informatën, policia ka ndërmarrë veprime hetimore që përfshijnë edhe marrjen e pamjeve të kamerave përreth.
“Janë duke u analizuar pamjet nga kamerat përreth, dhe janë marrë në pyetje disa dëshmitarë të rastit. Ata janë intervistuar por nuk kanë dëgjuar të shtëna. Lidhur me rastin është informuar prokurori i shtetit dhe nga i njëjti është udhëzuar të cilësohet rasti shkaktim i rrezikut të përgjithshëm”, tha ai.