Mosmarrëveshjet për prona po vazhdojnë të shkarkojnë përleshje e telashe të shumta mes qytetarëve, të cilat shpesh edhe eskalojnë në kërcënime serioze e sulme fizike. Në shumë prej rasteve të përfshirë në konflikt janë anëtarët e së njëjtës familje, raporton Gazeta Sinjali.
Kështu ka ndodhur dje në fshatin Arllat të komunës së Drenasit, ku si pasojë e lëndimeve të marra gjatë përleshjes, një person ka përfunduar në spital.
Burimet e Gazetës Sinjali brenda Emergjencës së Qendrës Kryesore të Mjekësisë Familjare në Drenas kanë bërë me dije se 52-vjeçari është dërguar atje me lëndime trupore, të cilat dyshohet se i ishin shkaktuar nga një mjet i fortë.
Për shkak të natyrës së lëndimeve, viktima është transferuar në Qendrën Klinike Universitare të Kosovës për trajtim të mëtutjeshëm mjekësor, ndërkohë që është njoftuar edhe Policia e Kosovës.
Njësitë policore kanë dalë në vendin e ngjarjes, ku kanë kontaktuar me viktimën si cili ka bërë me dije se i gjithë sherri me kushëririn e tij ka nisur për shkak të një kontesti pronësor. 55-vjeçari dyshohet se e ka sulmuar fizikisht viktimën, duke e goditur me një shkop druri.