Skuadra e Romës ka vazhduar me fitore në Ligën e Konferencës.
Roma mbrëmë arriti të mposht pa ndonjë problem skuadrën e Zorya Luhansk 3-0, transmeton lajmi.net.
Trajneri i ‘Gjallorosëve’, Jose Mourinho është shprehur i lumtur me rezultatin pas ndeshjes.
“Më pëlqeu rezultati, i cili është ai që ka rëndësi në fund”.
“Disa ditë më parë ne dominuam kundër një ekipi që u duk i vogël dhe megjithatë humbëm. Ndaj Zoryas fituam dhe kjo është gjëja më e rëndësishme”.
“Na duhen pesë apo gjashtë pikë të tjera për të siguruar kualifikimin. Shumë lojtarë pushuan, ne nuk patëm ndonjë dëmtim të ri, kështu që gjithçka është pozitive”.
Mourinho mori disa vendime befasuese në mesfushë, duke inkuadruar Ebrima Darboe, por i riu e shpërbleu trajnerin e tij me një asistim të shkëlqyer për Stephan El Shaarawy dhe disa pasime të tjera të shkëlqyera.
“Darboe luajti shumë mirë. Ai i dha ekuilibrin ekipit dhe ishte i mirë në zotërim. Më pëlqyen edhe lëvizjet e tij mbrojtëse. Doja t’i jepja Amadou Diawara një mundësi për të luajtur edhe në pjesën e dytë”.
“Chris Smalling komunikoi mirë me mbrojtjen e tij, kështu që është pozitive së bashku me golin”.
Roma përballet me Empolin në Serie A këtë fundjavë, pasi ka humbur dy ndeshje tashmë nga Verona dhe Lazio.
“Është gjithmonë e rëndësishme të kthehemi në rrugën e fitores pas një humbjeje. Empoli ka nëntë pikë, ata janë një ekip i vështirë për t’u përballur dhe djemtë do të kthehen në Romë vonë”.
“Ata do të bëjnë sakrificën duke qëndruar në terrenin e stërvitjes gjatë natës dhe duke stërvitur në mëngjes, pastaj mund të shkojnë në shtëpi për pak”, përfundoi Jose Mourinho.