Ka tri ditë që mësimdhënësit i kanë dhënë fund grevës njëmujore dhe i janë kthyer mësimit të rregullt, shkruan portali Rajoni.org.
Mirëpo tash, ata po ballafaqohen me një sfidë tjetër nga Ministria e Financave dhe ministri Hekuran Murati. Sipas Muratit mësimdhënësit nuk do t’i marrin pagat për muajin që nuk punuan, dhe për këtë ata pretendojnë se janë të mbështetur edhe në Kushtetutën e Republikës së Kosovës.
Ministri Murati ka një pyetje nga mësimdhënësi i Gjuhës dhe i letërsisë shqipe në Gjimnazin “Hamëz Jashari” në Skënderaj, prof. Nezir Bejta.
Sipas këtij të fundit, jo veç mësimdhënësit, por edhe Murati që po “dënon” për shkelje të ligjit, ka shkelur vet ligjin me ekzekutimin e pagesave për shërbyesit civilë, të cilët ishin në grevë njësoj si mësimdhënësit.
Postimi i tij i plotë:
“Shkelësit e ligjit
Zoti Ministër,
Unë edhe mund ta kem shkelur ligjin lidhur me grevën njëmuajshe që e mbajtëm ditë më parë, dhe për këtë ju ma ndaluat pagën, burimin e vetëm të jetës, por ty ç’t’u desh që e përsërite gabimin tim, kur ua procesove pagat shërbyesve civilë, të cilët po ashtu ishin në grevë.
Me keqardhje po të paralajmëroj zoti Ministër se mua edhe njëherë më duhet ta shkeli këtë farë dreqligji, duke i mashtruar njerëzit, sepse mundësia për të vjedhur s’po më jepet.
Mua ma ndale pagën sepse e shkela ligjin, po ty kush do të ta ndalojë?!”