Punëtorët që bënin rinovime në një fushë golfi skocez bënë një zbulim befasues, një mesazh 95-vjeçar në një shishe të varrosur në një bunker.
“Golf House Club” në Elie, i cili u krijua në maj të vitit 1875, tha se punëtorët po bënin përmirësime në bunkerë, kur gjetën një shishe të varrosur në njërën nga to.
Punëtorët shikuan brenda shishes dhe gjetën një mesazh të shkruar në anën e pasme të një pakete cigaresh Craven. Mesazhi ishte i datës 18 nëntor 1926.
“Ne jemi sot këtu, por ku do të jemi kur të gjendet kjo nuk e dimë. Paç fat”, thuhet në mesazh, përcjell Klankosova.tv
Gavin Cook, sekretari i klubit të golfit, tha se zyrtarët shikuan të dhënat dhe përcaktuan se tre burrat që nënshkruan shënimin, T. Donaldson, D. King dhe W. Eason, ishin punonjës në objekt në vitet 1920.
Cook tha se punëtorët që kanë gjetur shënimin planifikojnë të varrosin mesazhin e tyre në një shishe, në të njëjtin vend pasi të përfundojë puna.