Një rast i rëndë ka ndodhur ditë më parë në Spitalin e Gjakovës. Një grua me probleme shëndetësore ka ushtruar dhunë ndaj burrit të saj, i cili është pjesërisht i palëvizshëm dhe po trajtohet në këtë spital. Pamjet nga ky rast janë publikuar në rrjete sociale, por Gazeta Express nuk do t’i publikojë për shkak të ndjeshmërisë së rastit.
Rastin për Gazetën Express e ka konfirmuar Drejtori i Policisë për Rajonin e Gjakovës, Lumni Graishta.
“Po, rasti është raportuar më datë 18.01.2022 por që dyshohet të ketë ndodhur më datë 14.01.2022 rreth orës 03:00. Një videoincizim është pranuar në adresën zyrtare të PK-së ku një person i dyshuar (femër) shihet duke e goditur viktimën (burrë, pacient i shtruar në spitalin rajonal në Gjakovë). Pas identifikimit të personave në videoincizim, policia në Gjakovë ka arrestuar të dyshuarën dhe e njëjta me urdhër të prokurorit ndalohet për 48 orë por për shkak të probleme shëndetësore të natyrës emocionale, e njëjta vendoset në repartin e neuropsikiatrisë në spitalin rajonal në Gjakovë”, ka thënë Graishta.
Detaje të tjera rreth rastit ka dhënë zëdhënësi i Policisë për këtë rajon, Nysret Xhurkaj.
“ Me datë 14.01. 2022 rreth orës 03:00 , e dyshuara kishte sulmuar fizikisht viktimën (burrin e saj), i cili është pjesërisht i pa lëvizshëm. Rasti ka ndodhur në repartin e neurologjisë në spitalin “Isa Grezda” – Gjakovë. Viktima ka pësuar lëndime trupore”, ka thënë Xhurkaj.
Ai ka bërë me dije se e njëjta është arrestuar, por se shkaku i problemeve shëndetësore të natyrës emocionale, e njëjta është dërguar në repartin e neuropsikiatrisë në spitalin rajonal në Gjakovë.
“Viktimës i është ofruar ndihma mjekësore, si dhe mbrojtësi i viktimave është njoftuar për rastin e ndodhur, po ashtu prezent ka qene dhe punëtori qendrës sociale. E dyshuara ( bashkëshortja) është shoqëruar në Stacionin policor, është intervistuar dhe në konsultim me prokurorin kujdestar, e njëjta mbahet në ndalim policor, por për shkak te gjendjes se saj mendore, me udhëzim te mjekut psikiatër, e njëjta është hospitalizuar në repartin e psikiatrisë, nën shoqërimin e zyrtarëve policor”, ka thënë Xhurkaj./Gazeta Express
