Nepotizmi, keqmenaxhimi dhe kapja e çdo pore të jetës në komunën e Skënderajt nga udhëheqësia komunale ka shkaktuar pakënaqësi jo veç te subjektet e tjera politike dhe qytetarët e thjeshtë, por edhe te militantët e aktivistët e vetë PDK-s, shkruan Rajoni.org.
Kjo po ndodh pikërisht te kjo parti që po udhëheq me komunën e Skenderajt.
Sipas burimeve të Rajonit tashmë një grup i të rinjve të kësaj partie kanë vendosur që të ndahen nga PDK-ja dhe ta formojnë një subjekt të ri politik. Kjo, për shkak të pakënaqësive nga gjendja e palakmueshme dhe nga padrejtësitë që po ndodhin në këtë komunë si në punësim ashtu edhe në sfera të tjera.
Ky grup do të krijojë një subjekt i cili do të përfaqësonte vlerat e mirëfillta të kësaj partie, që siç thanë ata zanafillën e ka në luftën e lavdishme të UÇK-s.
Sipas burimeve brenda këtij këshilli iniciues po marrin pjesë kryesisht të rinjtë që kanë përfunduar studimet. Pastaj, ata do të paraqesin një energji të re në skenën e këtushme politike.
Zyrtarizimi i kësaj partie do të ndodhë në javën tjetër, dhe sipas burimeve të njëjta ajo do të jetë në Prekaz./Rajoni.org/