Kandidati për kryetar të Drenasit nga radhët PDK-së, Ramiz Lladrovci, i ka pritur në shtëpinë e tij deputetin Abelard Tahiri dhe shefin e Nazim Bllacës dhe Fahredin Gashit, Azem Sylën, i cili po akuzohet për krim të organizuar, transmeton paparaci.
“Sonte, me kënaqësi prita në shtëpi dy mysafirë të nderuar e të dashur, Azem Sylën dhe Abelard Tahirin, ku së bashku vlerësuam përkushtimin e strukturave të degës dhe rëndësinë e fitores që na pret më 14 nëntor”, ka shkruar Lladrovci.
“Bastioni në Drenas, qytetarët, aktivistët dhe anëtarët e devotshëm, nuk do të lejojnë të largohet nga komuna jonë vendi i parë për qeverisje të mirë. Kështu do të jetë edhe në katër vitet e ardhme.Faleminderit për vizitën dhe takimin, Azem dhe Abelard”.
Ndryshe, kanë kaluar më shumë se një vit nga seanca e fundit gjyqësore në rastin e njohur si “Toka”, ku ish- deputeti i Partisë Demokratike të Kosovës (PDK) Azem Syla dhe 17 persona të tjerët po akuzohen për krim të organizuar në tjetërsim të tokave me pronësi shoqërore në Veternik e Llapnasellë.
Seanca e fundit që ishte mbajtur më 19 shkurt 2020, ndërsa që nga atëherë nuk është caktuar ndonjë datë për seancë tjetër.
Kurse, në një proces tërësisht të mbyllur për publikun, Nazim Bllaca ishte dënuar me 6 muaj burg nga Gjykata në Ferizaj në vitin 2017 për veprën penale të legalizimit të përmbajtjes së pavërtetë.
Bllaca dyshohej se në vitin 2007 ka vënë në lajthitje organin kompetent për vërtetimin e kontratave në Gjykatën Komunale në Ferizaj, duke prezantuar dokumente publike të falsifikuara, më konkretisht autorizime, gjoja të vërtetuara në Gjykatën Komunale në Lipjan dhe më pas me anë të këtyre autorizimeve ka legalizuar një kontratë të shitblerjes në maj të vitit 2007.