Drejtuesi i Institutit për Afirmimin e Marrëdhënieve Ndëretnike, Fatmir Sheholli, tha sot se nënkryetari i Listës Serbe, Millan Radoiçiq dëshirojë të dërgojë një mesazh se “Kosova po përgatit diçka” në raport me situatën e serbëve në vend.
Duke komentuar video-mesazhin e Radoçiqit, i cili u paraqit dje me tone kërcënuese ndaj serbëve të Kosovës, Sheholli nxori dy përfundime për prezantimin e kriminelit të dyshuar serb të veriut.
“Unë besoj që ky prezantim i tij i djeshëm i ka disa segmente dhe ato duhet t’i themi haptas: ajo e para që më lë përshtypje të asaj që pashë është se ai është udhëheqës i serbëve të Kosovës dhe të gjithë duhet t’i nënshtrohen mendimeve të tij. E dyta: është sfidë jashtëzakonisht e madhe për të gjitha organet e sigurisë së Kosovës, sepse siç e dimë z. Radoiçiq si nënkryetar i Listës Serbe është nën hetime prej organeve të jurisprudencës”, deklaroi Sheholli.
“Ajo që më lë përshtypje të jashtëzakonshme gjithashtu është se z. Radoiçiq dëshiron që popullit serb në Kosovë t’i dërgojë mesazh që diçka Kosova përgatit dhe për këtë arsye ai ndodhet këtu”, u shpreh Sheholli në një intervistë për Klan Kosova.
Sheholli është anëtar i shoqërisë civile dhe drejton një institut në Graçanicë.