Ish-kryetari i Mitrovicës, Agim Bahtiri ka reaguar pasi qeveria nuk i ekzekutoi pagat për mësimdhënësit grevistë.
Bahtiri përmes një postimi në Facebook ka ftuar ministrin e Financave, Hekuran Murati që t’i ekzekutojë pagat e mësimdhënësve pa vonesë, shkruan Jepi zë.
Në anën tjetër tha se edhe mësimdhënësit duhet t’i kompensojnë orët e humbura mësimore gjatë këtij viti shkollor.
Postimi i plotë:
Pagat e mësimdhënësve duhet patjetër të ekzekutohen nga Ministria e Financave. Andaj, ftoj ministri Hekuran Murati që t’i ekzekutoj pagat pa vonesë.
Inflacioni financiar i muajve të fundit dhe shpenzimet e shtuara familjare për t’u përgatitur për dimër, domosdoshmërisht që vendosin në vështirësi familjet e mësimdhënësve. Kur shtojmë këtu edhe faktin se shumica prej mësimdhënësve kanë kredi në bankat komerciale, atëherë mos-ekzekutimi i pagave do t’i godiste rëndë mësimdhënësit dhe familjet e tyre.
Ekzekutimi i pagave do të duhet të përcillet edhe me obligimin që mësimdhënësit t’i kompensojnë orët e humbura mësimore gjatë këtij viti shkollor.