Konferenca e radhës për ecurinë e çështjes ndaj ish krerëve të Ushtrisë Çlirimtare të Kosovës dhe zgjerimin e aktakuzës nga Zyra e Prokurorit të Specializuara, do të mbahet sot duke filluar në orën 10:00.
Seanca për Hashim Thaçin fillon në orën 10:00, ajo ndaj Kadri Veselit në orën 11:15, Jakup Krasniqit në orën 14:00 dhe e fundit seanca ndaj Rexhep Selimit në orën 15:15.
Më 29 prill 2022, Zyra e Prokurorit Special ka dorëzuar aktakuzën e ndryshuar kundër Thaçit, Veselit, Selimit dhe Krasniqit.
Aktakuza pritet të rëndohet me akuza të reja që i referohet krimeve që pretendohet të jenë kryera në fshatrat e Suharekës dhe Gjilan.
Gjykata Speciale versionin e redaktuar të aktakuzës së re e ka publikuar në ueb-faqen e saj.
Aktakuza ndaj Thaçit dhe të tjerëve është konfirmuar më 26 tetor 2020 nga Gjykata Speciale në Hagë.
Akuza ndaj tyre në kohë shtrihet midis marsit të vitit 1998 dhe shtatorit të vitit 1999.
Ish-krerët e UÇK-së po mbahen në qendrën e paraburgimit në Hagë prej nëntorit të vitit 2020.
