Ministri i Punëve të Brendshme, Xhelal Sveçla, njoftoi se Policia sot patrulloi për herë të parë në liqenin e Ujmanit përgjatë vijës kufitare me Serbinë.
Sveçla shkroi se kjo po ndodh për herë të parë që nga paslufta.
“Për herë të parë që nga paslufta, pas krijimit të njësitit për patrullim ujor, Policia e Kosovës sot filloi me patrullimin e rregullt të vijës kufitare mes Republikës së Kosovës dhe Serbisë, si dhe gjithë hapësirës së Liqenit të Ujmanit. Tashmë, kontrolli i kufirit shtetëror është më i plotë. Përgëzoj Policinë e Kosovës për suksesin e radhës!”, shkroi ai.
Katër vjet më parë, në shtator të vitit 2018, andej kishte lundruar me një anije atëherë presidenti i Kosovës, Hashim Thaçi.
“Sot pata kënaqësinë që në një vizitë rutinë normale të punës, ta vizitoj pikën kufitare në Bërnjak, të takoj policë të Kosovës, të takoj zyrtarët kufitarë. Ishte një mrekulli të shihje të gjithë njerëzit, të kombësive të ndryshme, shqiptarë, serbë e boshnjakë, të gjithë pa dallim në shërbim të rendit, në shërbim të ligjit, në shërbim të së mirës, në shërbim të lëvizjes së lirë të njerëzve, të mallrave, pra situatë krejtësisht normale”, shprehej atëherë Thaçi.