Rastet e dhunës në familjet në Kosovë nuk po kanë të ndalur. Në shumicën prej tyre viktima janë gratë e vajzat, të cilat përjetojnë dhunë psikike e fizike nga anëtarët e familjes. Një ngjarje e tillë ka ndodhur edhe sot në një familje në fshatin Shtrubullovë të Drenasit, raporton Gazeta Sinjali.
Sinjali mëson se këtë herë babai 45-vjeçar dyshohet se ka ushtruar dhunë fizike dhe psikike ndaj vajzës së tij 13-vjeçare. Burimet brenda Prokurorisë thonë se i dyshuari e ka kapur për fyti vajzën e tij dhe e ka ndjekur me një thikë nëpër shtëpi, duke i shkaktuar shqetësim të madh.
E frikësuar nga sjelljet e babit, e mitura e ka denoncuar atë dhe ka kërkuar ndihmë nga policia para se t’i ndodhë diçka më e keqe.
Si rezultat i denoncimit, Policia është vënë në veprim dhe ka arrestuar të dyshuarin, i cili është shoqëruar më pas në stacion policor, ku ka dhënë deklaratë për motivet e sulmit ndaj vajzës së tij.
Prokurori i Shtetit ka vlerësuar se denoncimi që është ushtruar kundër tij provon mjaftueshëm se i njëjti dyshohet se ka ushtruar dhunë në familje, prandaj duhet të ndalohet për 48 orë.