Presidenti i Serbisë, Aleksandar Vuçiq, është shprehur i shqetësuar për deklaratën e presidentit të Shteteve të Bashkuara të Amerikës, Joe Biden, se lufta në Ukrainë do të zgjasë.
“Unë e njoh Bidenin si një njeri shumë të kujdesshëm që përgatit gjithçka. Në bisedën tonë të parë kuptova se ai ka një ekip që e përgatit jashtëzakonisht, nëse ka thënë diçka, nuk e ka thënë rastësisht”, tha ai për televizionin serb “TV Prva”.
Vuçiq ka folur edhe për situatën në Kosovë dhe thënë se paqja në rajon është duke u rrezikuar.
Rreth zgjedhjeve të Serbisë, ai ka thënë se po ka tentim që atij t’ia mohojnë afro 50 mijë vota nga serbët e Kosovës.
“Ka tentativa nga njerëz të papërgjegjshëm që të bëjnë diçka. Kështu është rasti edhe me zgjedhjet në Kosovë e M. Unë i marrë më shumë se 90 për qind të votave atje. Kanë llogaritur se nuk do të heqë dorë nga 50 mijë vota, dhe se do të më shtyjnë të futem në këtë, e pastaj ta shohim se kë do ta dëbojmë nga Kosova e M”, tha Vuçiq.
“Ato 50 mijë vota, nëse ky është dallimi që më duhet për të fituar, atëherë edhe bën të mos jem në pushtet. A është më me rëndësi votimi apo të mbahen gjallë serbët në Kosovë e M? E di se si do të dukej, serbët do të mbroheshin. A është më e vlefshme një jetë në Kosovë apo 50 mijë vota?”.
Sipas tij, puna e vetme e rajonit është të përgojojë Serbinë, në mënyrë që të “ta ndalojnë Serbinë në zhvillimin ekonomik”.
“Shikoni se çfarë po bëjnë Albin Kurti dhe Gjukanoviq, po e shfrytëzojnë rastin, puna e vetme është të përgojojnë Serbinë, të thonë se Vuçiq është Putini i vogël, që të mos e rëndojmë gjithë Perëndimin me Serbinë, Serbia nuk flet kurrë për ata, për ta ndalur Serbinë në rritjen ekonomike. Ata nuk bëjnë gjë tjetër veçse gënjejnë”, tha ai, duke shtuar se këto ishin artikuj me pagesë në British Guardian.